កូវីដ១៩៖ អ្នកជំនាញចិន​ ថាការមិនពាក់ម៉ាស់ដើម្បីការពារខ្លួន គឺជា«កំហុសឆ្គង»

ពត៌មានអន្តរជាតិ
Spread the love

នៅអឺរ៉ុប ការ​ខ្វះ​ម៉ាស់ពាក់​​ ជាចំណោទខ្លាំង​ចំពោះការបង្ការ​និង​​ប្រយុទ្ធប្រឆាំង​នឹង​មេរោគ​កូរ៉ូណាថ្មី។ អ៊ីតាលី​ ប្រទេស​រងគ្រោះខ្លាំង​ជាងគេ បានខ្វះម៉ាស់​ប្រើប្រាស់ ហើយ​បាន​សុំ​ជំនួយ​ពី​សមាជិក​សហភាព​អឺរ៉ុប ពី​រុស្ស៊ី និង​ចិន​ជាដើម។ ពាក់ព័ន្ធ​នឹងការ​ប្រើ​ប្រាស់​ម៉ាស់​ពាក់​នេះ​ដែ​រ​ អង្គការសុខភាពពិភពលោក ក៏ដូចជា រដ្ឋាភិបាល​បារាំង  ធ្លាប់​​លើកឡើង​ថា «អ្នកមានរោគសញ្ញា ចាំពាក់ម៉ាស់ ចំណែកអ្នកមិនឈឺ មិនចាំបាច់ពាក់»។  ក៏ប៉ុន្តែ អ្នកជំនាញចិនវិញ បាន​យល់ឃើញ​ផ្ទុយ​នេះ។ អគ្គនាយកមជ្ឈមណ្ឌលត្រួតពិនិត្យនិងបង្ការជំងឺរបស់ចិន  លោក ចច កៅ (George Gao) ​បញ្ជាក់​​ថា « ការមិនពាក់ម៉ាស់ ដើម្បី​ការពារខ្លួន គឺជាកំហុសឆ្គង»។​

អ្នកវិទ្យាសាស្ត្រចិនជាន់ខ្ពស់ បណ្ឌិត​ George Gao បាន​ផ្តល់​បទសម្ភាសតាមទូរសព្ទ​ទៅ​ឱ្យ​អ្នកកាសែត​អាមេរិក​ ហើយ​ដែល​​ត្រូវបាន​​ស្រង់​ប្រសាសន៍​មកអះអាង​ថា៖ «តាម​យោលប់ខ្ញុំ នៅ​សហរដ្ឋ​អាមេរិក​និង​អឺរ៉ុបគឺ​ជាការ​ខុស​ឆ្គង​ធំណាស់​ដែល​ពលរដ្ឋ​​មិន​ពាក់​ម៉ាក់​ការពារ។ មេរោគកូរ៉ូណាថ្មីនេះចម្លង​ពី​មនុស្ស​ទៅមនុស្ស ដោយសារផ្លូវ​ដង្ហើម ​​តំណក់ទឹកមាត់ ឬទឹក​សំបោរ។ ​​តំណក់ទឹកមាត់ឬទឹក​សំបោរ ដើរតួនាទីសំខាន់​ណាស់ ក្នុងការ​ចម្លងមេរោគ​នេះ​។ ដូច្នេះ ម៉ាស់​ សំខាន់​ខ្លាំងណាស់​! ព្រោះថា គ្រាន់តែ​ការ​និយាយគ្នា​ធម្មតា ក៏អាច​​ខ្ទាតទឹកមាត់ និងអាច​ឆ្លង​គ្នា​បាន​ដែរ។»

នេះបើតាម​ការ​បញ្ជាក់​របស់ បណ្ឌិត​ George Gao នៅក្នុង​ទស្សនាវដ្តីវិទ្យាសាស្ត្រអាមេរិក Science ផ្សាយថ្ងៃទី​២៧មីនា។​ លោក​បណ្ឌិតរូបនេះ បន្ថែមថា «មនុស្ស​ច្រើន​ណាស់​ដែល​ឆ្លង​ តែ​មិន​មាន​រោគសញ្ញា ក៏ប៉ុន្តែ​ពួក​គេ​អាច​ចម្លង​រោគ​ទៅអ្នក​ដទៃបាន។ ហេតុនេះ ម៉ាស់​មួយ អាច​ការពារ​ខ្លួន​រួច​ពី​ការ​ចម្លង​រោគ​ដោយ​ទឹក​មាត់​ទឹក​សំបោរ ដែល​មាន​ផ្ទុក​មេរោគ ហើយ​ក៏​អាច​ជួយ​ការពារអ្នក​ដទៃពី​​ការ​ចម្លង បើក្នុង​ករណី​ខ្លួន​មាន​ផ្ទុក​មេរោគ​វិញនោះ។»

គួរ​ជ្រាបថា បច្ចុប្បន្ន​ លោក George Gao ជា​អគ្គនាយកមជ្ឈមណ្ឌលត្រួតពិនិត្យនិងបង្ការជំងឺរបស់ចិន ដែលមានបុគ្គលិកវេជ្ជសាស្ត្រជាង២ពាន់នាក់។  លោកបានទទួលការសិក្សានៅថ្នាក់បណ្ឌិតផ្នែកជីវគីមី នៅសកលវិទ្យាល័យ Oxford ប្រទេសអង់គ្លេស ហើយបានបន្តការស្រាវជ្រាវថ្នាក់កម្រិតក្រោយបណ្ឌិត នៅសកលវិទ្យាល័យ Harvard របស់អង់គ្លេសបន្ថែមទៀត ដោយយកជំនាញខាងប្រព័ន្ធការពារសរីរាង្គ​និងមេរោគវិទ្យា។ អ្នកវិទ្យាសាស្ត្រចិនជាន់ខ្ពស់រូបនេះ ធ្លាប់បានចុះផ្សាយអត្ថបទសិក្សាមួយចំនួន នៅទស្សនាវដ្តីវិទ្យាសាស្ត្រ New England Journal of Medicine និង ទស្សនាវដ្តីវេជ្ជសាស្ត្រអង់គ្លេស The Lancet​៕​

ប្រភព rfi

Leave a Reply

Your email address will not be published. Required fields are marked *