ក្រុមចោរឆក់២នាក់ដែលធ្វើសកម្មភាពឆក់អ្នកដំណើរតាមកង់បី ត្រូវបញ្ជូនទៅតុលាការហើយ

ពត៌មានជាតិ

(ភ្នំពេញ)៖ នគបាលព្រហ្មទណ្ឌកំរិតស្រាល នៃស្នងការដ្ឋានរាជធានីភ្នំពេញ នៅព្រឹកថ្ងៃទី៧ ខែកុម្ភៈ ឆ្នាំ២០២០នេះ បានបញ្ជូនក្រុមចោរឆក់វ័យក្មេងដ៏សកម្មចំនួន ០២នាក់ ក្នុងនោះមានម្នាក់ជាសិស្សសាលា ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការបើកការស៊ើបសួរ និងចោទប្រកាន់តាមផ្លូវច្បាប់។

មន្ត្រីនគបាលបានឱ្យអង្គភាពព័ត៌មាន Fresh News ដឹងថា ក្រុមចោរឆក់វ័យក្មេងទាំង២នាក់នោះមានទី១៖ ឈ្មោះ ហែម សំរិទ្ធស័ក្ត ហៅសាក់ម៉ាប់ ភេទប្រុស អាយុ១៨ឆ្នាំ, ទី២៖ ឈ្មោះ ដួង តារ៉ាស័ក្ត ហៅសាក់តូច ភេទប្រុស អាយុ១៨ឆ្នាំ។

លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកំរិតស្រាល រាជធានីភ្នំពេញ បានឱ្យដឹងថា កាលពីថ្ងៃទី៤ ខែកុម្ភៈ ឆ្នាំ២០២០ វេលាម៉ោងប្រហែល១៦៖០នាទី សមត្ថកិច្ច របស់លោកបានស្រាវជ្រាវឈានទៅឃាត់បានខ្លួនជនសង្ស័យចំនួន២នាក់ ស្ថិតនៅចំណុចមុខ ផ្ទះលេខ៣១ ផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

លោកវរសេនីយឯក ប៊ុន សត្យា បានបញ្ជាក់ថា ជនសង្ស័យបានប្រើប្រាស់ម៉ូតូ ជាមធ្យោបាយជិះធ្វើសកម្មភាព ដើម្បីប្រព្រឹត្តអំពើហិង្សា ឆក់ទូរស័ព្ទដៃម៉ាក IPhone11ពណ៌ខ្មៅ ស៊ីមកាតលេខ ០៩៥ ៧៥៥ ២៧៥ បណ្តាលឱ្យហើយបានបណ្តាលឱ្យជនរងគ្រោះ ធ្លាក់ពីលើរ៉ឺម៉កម៉ូតូកង់បី (PassApp) មកលើថ្នល់រងរបួសបែកចិញ្ចើមខាងឆ្វេងហូរឈាម។

សកម្មភាពនេះ ប្រព្រឹត្តនៅចំណុចមុខផែថ្មភ្នំពេញ តាមបណ្តោយផ្លូវព្រះស៊ីសុវត្ថិ ភូមិ១៤ សង្កាត់ស្រះចក ខណ្ឌដូនពេញ រាជធានីភ្នំពេញ កាលពីថ្ងៃទី២៨ ខែមករា ឆ្នាំ២០២០ វេលាម៉ោងប្រហែល១៣៖១០នាទី។

ជនសង្ស័យមានឈ្មោះទី១៖ ឈ្មោះ ហែម សំរិទ្ធស័ក្ត ហៅ សាក់ម៉ាប់ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះលេខ៣១ ផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ, ទី២៖ ឈ្មោះ ដួង តារ៉ាស័ក្ត ហៅសាក់តូច ភេទប្រុស អាយុ១៨ឆ្នាំ មុខរបរសិស្សវិទ្យាល័យឫស្សីកែវ ស្នាក់នៅផ្ទះលេខ៦ ផ្លូវបេតុង ភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។ វត្ថុតាងចាប់យក ម៉ូតូម៉ាកស៊ុយហ្សុយគីនិច ពណ៌ខៀវស ឆ្នាំផលិត២០២០ ពាក់ស្លាកលេខ ភ្នំពេញ១HY-៧១៦១។

ចំណែកជនរងគ្រោះ មានឈ្មោះ ហេង ភារម្យ ភេទប្រុស អាយុ៣៤ឆ្នាំ មានទីលំនៅបច្ចុប្បន្នស្នាក់នៅផ្ទះលេខ ៨អា ផ្លូវបេតុង ភូមិត្រពាំងមាន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ មុខរបរបុគ្គលិកក្រុមហ៊ុនកូកាកូឡា។ សម្ភារដែលបានបាត់បង់ទូរស័ព្ទដៃម៉ាក IPhone11 ពណ៌ខ្មៅ៕

Leave a Reply

Your email address will not be published. Required fields are marked *